O Rock & Long 2025 contará cunha emotiva homenaxe ao noso compañeiro e amigo Benito Oliveira, recentemente falecido, e que deixa tras de si un legado inesquecible no mundo do surf e da fotografía.
Desde a organización do festival queremos que Beni estea presente entre nós durante toda a fin de semana, e por iso animamos a todas as persoas asistentes a traer algunha das fotografías que el vos fixese, para colocalas polo Kanion no formato que cada quen desexe. Deste xeito, construiremos xuntos unha memoria colectiva que reflicta a súa paixón polo mar, pola cultura surfeira e polas persoas.
Ademais, o domingo 28 de setembro ás 10:30 da mañá, convocamos a toda a comunidade na praia de Montalvo para ofrecerlle un último saúdo conxunto desde o mar. Non será unha despedida, porque o seu legado permanecerá sempre con nós, pero si unha maneira simbólica e compartida de agradecerlle todo o que deixou. Pedímosvos que traiades flores, para ofrendarllas ao océano nun xesto colectivo de lembranza.
O espírito de Beni, a súa mirada e o seu amor polo surf seguirán presentes en cada onda e en cada fotografía.
